摘要：还记得小时候，弄堂里阿婆的叮嘱、邻里间的家长里短，都裹着软糯的上海话，是刻进骨子里的亲切。如今，这份熟悉的乡音有了新舞台！

还记得小时候，弄堂里阿婆的叮嘱、邻里间的家长里短，都裹着软糯的上海话，是刻进骨子里的亲切。如今，这份熟悉的乡音有了新舞台！

5月31日起，闵行区融媒体中心联合区委老干部局、区档案局推出《春申·讲好闲话之喇叭头里的乡音》沪语红色有声档案系列节目，邀请沪语播音员用地道上海闲话，为你播读新闵行成立30多年来那些具有时代代表性的新闻稿件。

原闵行广播电视台播音员 晨音

闵行区融媒体中心播音员 阿明

喇叭头里的乡音

女：阿明！长远碰不着了！最近好伐？

男：喔！是晨音呀！托侬个福！岁数勒拉上去，精神倒还可以！侬近抢忙点啥呀？

女：讲不忙嘛，倒也真有点忙。平常嘛，社区学校开没了沪语班，我就为一帮小朋友搭仔新上海人讲讲上海闲话。还有一桩斜气重要格事体，区融媒体中心要为沪语播音留点音像资料，我就帮仔弄弄呀。

男：讲起迭桩事体嘛，也真是“麦芒落啦针眼里——巧了”，融媒体中心也寻着我了。

女：是啊。时代飞速发展，勒拉海纳百川的上海，沪语倒有点像走向边缘的味道。我伲有责任去做好传承。

男：格末今朝，我伲就来谈谈广播“喇叭头”本身。哪能？

女：哎好个呀！

男：从上个世纪50年代人民公社化以来，一直到八十年代，广播喇叭是我伲农村城乡最普及的先进设施，埃个辰光大家没有噪音格概念，听到喇叭声感觉到斜气自然、亲切。

女：是个呀。天下大事、市郊新闻要了解，党的方针政策要宣扬，生产技能要推广传播，主要途径就是通过遍布乡村农民城镇居民屋里搭仔田里向的喇叭头。

男：侬一定记得，上海人民广播电台还专门有一档对农村广播个节目，沪语播音听来亲切，“阿富根谈生产”更是家喻户晓。

女：特别是万仰祖老师。哪是“额角头上搁扁担——头挑了！还有顾超、李征，朱慧老师佬啥，侪是呱呱叫个。

男：记得埃个辰光，每天大清老早6点钟，《社员都是向阳花》或者《学大寨》个播音开始曲在静静的晨空中悠然荡漾，它提醒人们一天忙碌个生活要开始了，应该碌起来烧早饭了。

女：前半个小时是本地新闻，6点30分开始转播中央人民广播电台新闻和报纸摘要。夜里向8点钟，统一转播中央人民广播电台各地新闻联播节目，播完就结束一天个播音。

男：碰到“三夏”“三抢”大忙，新闻联播节目后还有半个钟头个本地新闻节目。其实，迭个时辰光农民伯伯啦最想听个还是与生产联系最密切格气象预报，收购稻麦、棉花、粮油佬啥个信息。

女：嗯。埃个辰光，大部分个农户和居民屋里侪有喇叭头，在空旷个田头还有高音喇叭。

农村田间高音喇叭

男：到了冬季进入农闲，迭是兴修水利格大好时节，每年个开河工地，除了红旗猎猎，鼓舞人们士气个也当数广播喇叭。

女：我一位勒拉乡镇广播站个同事，还对我讲过伊亲身经历个一桩事体。他是编辑，搿天轮到他值机，写稿、组稿弄到半夜，开始睏勿着，后来朦朦胧胧中，到了早晨开机个辰光，预先设置个闹钟却呒没叫醒伊，造成大家集体睏晏早，结果吃了公社领导一顿批评。

男：讲起轶闻趣事，我身边也有一桩。当时，喇叭头里文艺节目占到相当比例，除了“样板戏”，也有相声、说唱咾啥。有一趟，有个社员“做生活”实在“衰瘏”加上肚皮咕咕叫，工间半个钟头想回去充点饥，但煤球炉已熄灭，镬子里向空荡荡。迭个辰光喇叭头里正播放着相声，笑声不断。伊顿时火冒八丈，“我正气上心来，侬喇叭里还勒拉看我笑话！”结果拎起铁搭，一记头就拿迭只喇叭头拉了下来，引得在场个人一顿哄笑。

女：到了上世纪80年代，随着城市化进程，田头个高音喇叭慢慢叫被拆除了，农户屋里厢格8寸舌簧喇叭也慢慢叫被音质更亲和一眼个4寸动圈喇叭所更新。

男：是个。县级广播电台、电视塔建起来，无线广播、开路电视开始进入家庭。

女：唉！从一根铁丝、一台功率放大器个小小喇叭头，到如今无线调频、光纤、光缆、宽带，再到数字整转，从“有线广播电台”“有线电视中心”“闵广科技”“东方网络”“融媒体”名称个变化，可以看到时代个飞速变化。

男：是个。网上缴费、电视点播回放、3D电视游戏佬啥个功能，更是不断提升着现代人个生活质量。今朝回忆起来真是感叹万千啊！喇叭头个故事，也是时代变迁格个故事。

女：是个呀！但是我想，变个是时代、容貌，不变个是我伲对绵绵沪语浓浓个情怀！

男：晨音呀，喇叭头的故事，可以讲交交关关。要么今朝先聊到此地，下趟再聊好伐？

女：好个呀！阿明，我伲多碰头。再会！

来源：今日闵行